ՀՀ բանկային համակարգում սկսված «խառնաշփոթը»` կապված մի շարք ցուցանիշների աճերի հետ, շարունակվում է։ Դրա մասին են վկայում ՀՀ առևտրային բանկերի կողմից պետբյուջե վճարված հարկերի ծավալների մակարդակները․
Վիճակագրական տվյալները փաստում են, որ 2023թ-ի երկրորդ եռամսյակում ՀՀ 17 առևտրային բանկերը միասին պետբյուջե վճարել են 72,635,322 հազ․ դրամի, իսկ առանց ՖԱՍԹ ԲԱՆԿԻ 70,628,321 հազ․ դրամի հարկեր։
Փաստորեն ստացվում է, որ 2023թ-ի առաջին եռամսյակի և 2022թ-ի երկրորդ եռամսյակի համեմատ ՀՀ առևտրային բանկերի կողմից վճարված հարկերի ծավալները 2023թ-ի երկրորդ եռամսյակում աճել են համապատասխանաբար 3,54 և 3,51 անգամ։
ՈՒսումնասիրենք 2023թ-ի երկրորդ եռամսյակի դրությամբ ՀՀ առևտրային բանկերից յուրաքանչուրի կողմից իրականացված հարկային վճարումների ծավալները․
Առկա վիճակագրական տվյալներով իրականացված հաշվարկները ցույց են տալիս, որ միայն 2023թ-ի երկրորդ եռամսյակում բանկերի կողմից վճարված հարկերի ընդհանուր ծավալների մոտ 50%-ը բաժին է ընկել ընդամենը երկու բանկի՝ Ամերիաբանկին և Արդշինբանկին։
Վերջիններս 2023թ-ի երկրորդ եռամսյակում պետբյուջե մուտք են արել համապատասխանաբար 17,885,929 և 17,397,384 հազ․ դրամի հարկեր։
Ամերիաբանկի կողմից վճարված հարկերի ծավալները 2023թ-ի երկրորդ եռամսյակում նախորդ եռամսյակի համեմատ աճել են մոտ 9, իսկ Արդշինբանկի պարագայում մոտ 12 անգամ։
2023թ-ի երկրորդ եռամսյակում նախորդ տարվա նույն եռամսյակի համեմատ Ամերիաբանկի կողմից վճարված հարկերի ծավալներն աճել են մոտ 6, իսկ Արդշինբանկի դեպքում՝ մոտ 7 անգամ։
2023թ-ի երկրորդ եռամսյակում վճարած հարկերի ծավալների անկում և՛ նախորդ եռամսյակի, և’ նախորդ տարվա նույն եռամսյակի համեմատ արձանագրվել է Ակբա բանկի և Հայէկոնոմբանկի պարագայում։
Մասնավորապես, Ակբա բանկի դեպքում ունենք համապատասխանաբար անկումներ 75%-ով և 25%-ով, իսկ Հայէկոնոմբանկի դեպքում՝ համապատասխանաբար՝ 55%-ով և 16%-ով։
✓Շատ կարևոր է պարզել` ինչպիսի գործընթացներ են հարկային վճարումների այս աճերի հիմքում: Այնուամենայնիվ, իր մեծ ազդեցությունն է թողնում նաև մեծածավալ ռուսական կապիտալի մուտքը Հայաստան։
Բաժանորդագրվեք մեր ալիքին Telegram-ում
