Անձնական խնամքի միջոցների շվեդական Essity ընկերությունը, որին պատկանում են Zewa, Libresse և Libero ապրանքանիշերը, վաճառել է իր ռուսական բիզնեսը 117 միլիոն դոլարով, նշված է ընկերության տարածած հաղորդագրության մեջ:
«Essity ընկերությունը… ավարտել է իր ձեռնարկությունների վաճառքը Ռուսաստանում մոտ 1,2 միլիարդ շվեդական կրոնով (117 միլիոն դոլար): Այսպիսով, Essity ընկերությունը լքել է ռուսական շուկան», — ասվում է հաղորդագրության մեջ։
Բիզնեսը գնել է «Նոր տեխնոլոգիաներ» ՍՊԸ-ն, որը պատկանում է Իգոր Շիլովին։ Իրավաբանական անձանց միասնական պետական ռեգիստրի տվյալներով՝ նրան են պատկանում այդ ընկերության 94,5 տոկոս բաժնետոմսերը, բացի այդ, նա Եվրոպական բժշկական կենտրոնի կլինիկաների ցանցի հիմնական սեփականատերն է: Եվս 5,5 տոկոսը պատկանում է «Նոր տեխնոլոգիաների» և ԵՄԿ-ի գլխավոր տնօրեն Անդրեյ Յանովսկուն։
Essity-ն մասնագիտացած է հիգիենայի եւ առողջապահության ոլորտում։ Ընկերության արտադրանքը վաճառվում է մոտ 150 երկրներում Tena, Tork, Jobast, Leukoplast, Libero, Libresse, Lotus, Nosotras, Saba, Tempo, Vinda և Zewa ապրանքանիշերի ներքո։ Ռուսաստանում ընկերությունն ուներ երեք գործարան ՝ Սովետսկում և Վենևում (Տուլայի մարզ) և Սվետոգորսկ/Կամեննոգորսկում (Լենինգրադի մարզ):
Շվեդական ընկերությունը ռուսական շուկայից հեռանալու մասին հայտարարել էր դեռ անցյալ տարվա ապրիլին։ Այդ ընթացքում նրա ռուսական ակտիվներն արժեզրկվել են 1,7 միլիարդ կրոնով (մոտ 166 միլիոն դոլար)։ Միևնույն ժամանակ, անցյալ տարի Ռուսաստանում վաճառքները կազմել են համախմբված զուտ վաճառքի ընդհանուր ծավալի միայն երկու տոկոսը:
Ինչպես պարզաբանել են ՌԴ արդյունաբերության և առևտրի նախարարությունում, կառավարումը ռուս բաժնետերերին փոխանցելուց հետո Essity ձեռնարկությունները կշարունակեն աշխատել: Նախարարությունից վստահեցրել են, որ դա չի անդրադառնա թողարկվող արտադրանքի տեսականու, ծավալների և արժեքի վրա։ Աշխատատեղերը նույնպես կպահպանվեն։
Բաժանորդագրվեք մեր ալիքին Telegram-ում
