Լուրեր են շրջանառվում, որ 2023թ-ի աշնանը հայաստանյան շուկա է մտնելու ռուսական «Ozon» առևտրային հարթակը: Անշուշտ, այս նորությունը կարելի է դրական համարել: Չնայած այն հանգամանքին, որ հայ հասարակությունը դեռևս ծանոթ չէ ռուսական «Ozon» առևտրային հարթակին և չի երևում թե ինչպիսի անակնկալներ կմատուցվեն, մրցակցության տեսանկյունից տեղի է ունենում դրական տեղաշարժ:
Հայաստանում կան տարբեր առևտրային հարթակներ, որոնցից շուրաքանչյուրը գրավել է շուկայի որոշակի հատված: Ռուսական առևտրային հարթակներից հանրության շրջանում հայտնի է «Wildberries»-ը, որի ծառայություններից օգտվում են թե՛ սպառողները, թե՛ բիզնես շրջանակները: Սակայն, առևտրային այս հարթակի մասով պարբերաբար խնդիրներ են առաջանում։ Բացի այդ՝ նկատելի են ընկերության՝ Հայաստանում ունեցած մենաշնորհային դիրքից օգտվելու նախանշանները: Հետևաբար, ռուսական ևս մեկ առևտրային հարթակի մուտքը Հայաստան կստեղծի ակտիվ մրցակցային պայմաններ, ինչի արդյունքում պետք է որ է՛լ ավելի բարձրանա մատուցվող ծառայությունների որակը:
Նոր հարթակի մուտքը նաև կազդի Հայաստանում առևտրաշրջանառության ծավալների վրա, որը 2023թ-ի հունվար-ապրիլ ժամանակահատվածում կազմել է 1,408,959.4 մլն դրամ:
Վերջինս 2022թ-ի հունվար-ապրիլի համեմատ աճել է մոտ 23%-ով: Նկատենք, որ առևտրաշրջանառության ծավալների աճին նպաստել են աճերը մի քանի ուղղություններով.
Գծապատկեր 1. Մանրածախ, մեծածախ և ավտոմեքենաների առևտրաշրջանառության ծավալները 2023թ-ի հունվար-ապրիլ ժամանակահատվածում
2023թ-ի հունվար-ապրիլ ժամանակահատվածում ընդհանուր առևտրաշրջանառության ծավալների 60%-ը կամ 849,817.2 մլն դրամը պատկանում է մեծածախ առևտրին: 2023թ-ի հունվար-ապրիլին 2022թ-ի նույն ժամանակահատվածի համեմատ մեծածախ առևտրի ծավալները աճել են մոտ 38%-ով:
Ընդհանուր առևտրաշրջանառության ծավալներում 35% մասնաբաժին ունի մանրածախ առևտուրը: Վերջինիս ծավալները 2023թ-ի հունվար-ապրիլին 2022թ-ի նույն ժամանակահատվածի համեմատ աճել են 3.2%-ով՝ կազմելով 494,364.4 մլն դրամ:
Ավտոմեքենաների առևտրի շրջանառության ծավալների մասնաբաժինը առևտրի ընդհանուր շրջանառության ծավալներում կազմում է մոտ 5%:
Տպավորիչ է այն, որ 2023թ-ի հունվար-ապրիլին 2022թ-ի նույն ժամանակահատվածի համեմատ ավտոմեքենաների առևտրի շրջանառության ծավալների աճը կազմել է մոտ 40%՝ հաստատվելով 64,778 մլն դրամ մակարդակում:
Բաժանորդագրվեք մեր ալիքին Telegram-ում
