Twitter-ի գնումը ֆինանսապես խելացի քայլ չէր, և ես կրկնակի վճարեցի դրա դիմաց. Մասկ

Twitter-ի սեփականատեր Իլոն Մասկը Twitter-ի գնումն անվանել է վատ ֆինանսական որոշում, գոնե առայժմ: Fox News-ի հաղորդավար Թակեր Կառլսոնին տված հարցազրույցում նա անդրադարձել է  44 միլիարդ դոլար վճարած գնին՝ ասելով, որ «մնում է առաջիկայում պարզել, թե արդյոք սա ֆինանսապես խելացի քայլ էր, ներկայումս դա այդպես չէ»:

Միլիարդատերը նշել է, որ Twitter-ն իրականում արժե իր գնման արժեքի ընդամենը կեսը՝ կարծես հաստատելով անցած ամիս ներկայացված ներքին հուշագիրը, որում ընկերությունը գնահատվում է մոտ 20 միլիարդ դոլար:

Չնայած այս ֆինանսական քննադատությանը՝ Մասկը չի ափսոսում Twitter-ը գնելու համար, քանի որ «որոշ բաներ անգին են»՝ ընդգծելով Twitter-ը խոսքի ազատության առցանց ապաստարան դարձնելու իր նպատակը:

Ըստ վերլուծաբանների՝ Մասկը կտրուկ հակասական ազդանշաններ է ուղարկել Twitter-ի ֆինանսական առողջության մասին: Միայն անցյալ տարվա նոյեմբերին նա ներդրումային կոնֆերանսի ժամանակ հրապարակավ կանխատեսել է, որ Twitter-ը կարող է դառնալ աշխարհի ամենաթանկ ընկերությունը, մինչդեռ նա մասնավոր զրույցի ընթացքում աշխատակիցներին ասել է, որ ընկերությունը գտնվում է սնանկացման ճանապարհին՝ առանց բաժանորդագրության զգալի աճի:

Իսկ անցյալ շաբաթ նա պնդել է, որ Twitter-ը գտնվում է «մոտավորապես անկման կետում»՝ կապված աշխատատեղերի ահռելի կրճատումների և գովազդից որոշ եկամուտների վերադարձի հետ, և պետք է ունենա դրական դրամական հոսք հաջորդ եռամսյակում: Իսկ իրականում Twitter-ի իրական ֆինանսական վիճակն այլևս հայտնի չէ այն պահից, երբ Մասկը մասնավորեցրեց ընկերությունը։