Թուրքիային` մեկ միլիարդ եվրո, իսկ Սիրիային՝ ավելի քան հարյուր միլիոն եվրո. Եվրահանձնաժողովը նախատեսում է աջակցել տուժած երկրներին՝ երկրաշարժից հետո վերականգնման համար: Reuters-ի փոխանցմամբ՝ այս մասին հայտարարություն է արել նախագահ Ուրսուլա ֆոն դեր Լայենը՝ Բրյուսելում կայացած միջազգային դոնորական խորհրդաժողովի բացման ժամանակ:
Ուրսուլա ֆոն դեր Լայենը նշել է նաև, որ միլիոնավոր մարդիկ անօթևան են մնացել՝ հիշեցնելով, որ երկու երկրներում երկրաշարժը շուրջ 50 հազար մարդու կյանք է խլել՝ դառնալով տարիների ընթացքում տարածաշրջանում ամենախոշոր բնական աղետը: Ըստ ԵՀ ղեկավարի՝ անհրաժեշտ է միջոցներ հավաքագրել՝ սեյսմիկ անվտանգության ամենաբարձր չափանիշներին համապատասխան տներ, դպրոցներ և հիվանդանոցներ կառուցելու համար: Նա ընդգծել է նաև, որ հանրային ծառայությունները և ձեռնարկությունները կապիտալի կարիք ունեն, որպեսզի վերսկսեն աշխատանքը, որպեսզի մարդիկ կարողանան գումար վաստակել:
