«Հրապարակն» այսօր տեղեկացրել էր, որ «Գոլդեն Փելես» հյուրանոցի շենքը ձեռք բերող, նախկին վարչապետ Հովիկ Աբրահամյանի տան մեծահարուստ գնորդ, նոր հայ բիզնեսմեն, «Պրոյեկտ ինտեր-ինվեստ» ընկերության հիմնադիր Նարեկ Նալբանդյանը բենզինի ու ցորենի ներկրմամբ զբաղվելու ընթացքում հայտնվել է Պետեկամուտների կոմիտեի տեսադաշտում։ ՊԵԿ-ը պարզել է, որ տարբեր մեքենայությունների արդյունքում պետական բյուջե հարկեր չեն վճարվել։
Առաջին խախտումն ավարտվել է վնասների փոխհատուցմամբ՝ ՊԵԿ քննչական վարչությունում քրեական վարույթի հարուցումից հետո Նարեկ Նալբանդյանը վերականգնել է պետությանը պատճառած վնասը։ Սակայն ինչ որ ժամանակ անց նա կրկին սկսել է խաբել պետությանը և այս անգամ արդեն ՊԵԿ-ը վարույթ է հարուցել, որը կարող է անգամ կալանքով ավարտվել։
ՊԵԿ հասարակայնության հետ կապերի վարչությունից հաստատել են նախորդ անգամվա խախտումը, որը ավարտվել է վնասների հատուցմամբ։
ՊԵԿ-ից «Հրապարակին» ասել են, որ անցած տարի օպերատիվ հետախուզական միջոցառումների արդյունքում պարզվել է, որ «Պրոյեկտ ինտեր-ինվեստ» ընկերությունը 1 միլիարդ 496 միլիոն, 769 հազար դրամի վնաս է պատճառել պետությանը՝ հարկերից խուսափելով։ Դրա առիթով հարուցվել է քրեական գործ և ավարտվել է վնասների վերականգնմամբ։
Բաժանորդագրվեք մեր ալիքին Telegram-ում
