Հետվճար գոյանո՞ւմ է արդյոք մինչև 2 տարեկան երեխայի խնամքի նպաստից

Արդյոք մինչև 2 տարեկան երեխայի խնամքի նպաստ ստացողները կարող են օգտվել կենսաթոշակի և նպաստի 10% հետվճարի ծրագրից, անկանխիկ գործարքների դեպքում ինչպե՞ս է հաշվվում մի քանի ամսվա կենսաթոշակից գոյացած հետվճարը, ինչպես կարելի է հետվճար ստանալ՝ կատարելով կոմունալ վճարումներ․

ԱՍՀՆ Տելեգրամ ալիքում այս ծրագրի մասին հաճախ տրվող 5 հարցի է անդրադարձել՝

❓ 1․ Ո՞ր բանկերն են միացել անկանխիկ գործարքների դեպքում կենսաթոշակի մինչև 10% հետվճարի ծրագրին։

✅ -Այս պահին ծրագրի շրջանակում՝ ԱՍՀ նախարարության հետ համագործակցող բանկերն են՝ ՎՏԲ Հայաստան բանկ, Արդշինբանկ, Հայէկոնոմ բանկ, Հայբիզնես բանկ և Ակբա բանկ։ Նախարարությունը պատրաստակամ է համագործակցել ծրագրին միանալ ցանկացող այլ բանկերի հետ ևս։

❓2․ Եթե ինձ սպասարկող բանկը չի միացել ծրագրին, կարո՞ղ եմ փոխել քարտս ու ստանալ անկանխիկ գործարքներից գոյացող հետվճարը։

✅-Այո, հնարավոր է։ Այս դեպքում կարող եք դիմել Միասնական սոցիալական ծառայության ցանկացած տարածքային կենտրոն։

❓3․ Հնարավո՞ր է կոմունալներ վճարելուց հետո ստանալ կենսաթոշակիս հետվճարը։

✅-Այո, հետվճարի ծրագիրը գործում է նաև կոմունալներն անկանխիկ վճարելու դեպքում՝ այն պարագայում, եթե վճարումն արվել է քարտը թողարկած բանկի բանկոմատով կամ իրականացվել է տվյալ բանկի մոբայլ հավելվածի միջոցով։

❓4․ Մինչև 2 տարեկան երեխայի խնամքի նպաստից հետվճար գոյանո՞ւմ է։

✅-Այո՛։ Հետվճար կարող են ստանալ նաև մինչև 2 տարեկան երեխայի խնամքի նպաստ ստացող ծնողները։

❓5․ Մի քանի ամիս թոշակը չծախսելու դեպքում հետվճարի 10%-ն ինչպե՞ս է հաշվվում։

✅-Հետվճարը հաշվվում է կատարած անկանխիկ գործարքների գումարի 10%-ի չափով, բայց ոչ ավելի քան 5000 դրամը։ Օրինակ՝ եթե քաղաքացին կենսաթոշակի կամ նպաստի քարտով անկանխիկ տնօրինել է 60,000 դրամ, հաջորդ ամիս հետվճարի գումարը կկազմի 5000 դրամ։