ՀՀ ֆինանսական համակարգը շարունակում է հաստատուն քայլերով առաջ շարժվել։ Բանկերը զարգանում են` բերելով նոր հնարավորություններ մարդկանց համար: Մասնավորապես, զարգանում է վճարահաշվարկային համակարգը, որը օր օրի հաճախորդներին առաջարկում է վճարման առավել առաջանցիկ հնարավորություններ: Ներկայումս Հայաստանում դժվար է գտնել մարդկանց, ովքեր թղթադրամներով են իրենց գործարքները կատարում: Ավելի հաճախ մարդիկ օգտագործում են իրենց բանկային քարտերը։ Վերջիններիս անցմանը նաև նպաստել է աշխատավարձերի, թոշակների և այլ վճարների փոխանցումը քարտերին:
Շուկայում հայտնվում են նոր քարտեր` նոր հնարավորություններով և անակնկալներով: 2022 թ․-ի 4-րդ եռամսյակում ՀՀ բանկերի կողմից թողարկված՝ շրջանառության մեջ գտնվող քարտերի քանակը կազմել է 3,183,489 միավոր: Նկատենք, որ թողարկված քարտերի քանակն աճել է 2021 թ․-ի 4-րդ եռամսյակի համեմատ 18 %-ով, իսկ նախորդ եռամսյակի համեմատ՝ 4 %-ով:
Հետաքրքիր է ուսումնասիրել՝ ինչ քարտեր են շրջանառվում Հայաստանում.
Հայաստանում շրջանառվող քարտերի 47 %-ը VISA քարտերն են: ԱՐՔԱ-ի և Master Card-ի մասնաբաժինները գրեթե հավասար են և կազմում են համապատասխանաբար 24 % և 23 %: Նկատենք, որ ՀՀ-ում շրջանառվող քարտերը լինում են հաշվարկային, դեբետային և վարկային: Բացի այդ՝ քարտերից օգտվում են ինչպես ֆիզիկական, այնպես էլ իրավաբանական անձինք: Հետաքրքիր է, որ 2022 թ․-ի 4-րդ եռամսյակի դրությամբ քարտերի գրեթե 99 %-ը պատկանում է ֆիզիկական անձանց: Վարկային քարտերի մասնաբաժինը շրջանառվող քարտերի քանակում կազմում է 2 %: Վերջինիս զգալի մասը ևս պատկանում է ֆիզիկական անձանց.
ԿԲ տվյալների համաձայն` 2022 թ․-ի 4-րդ եռամսյակում ֆիզիկական անձանց տրամադրված վարկային քարտերի ծավալը կազմել է 62,483, իսկ իրավաբանական անձանց պարագայում՝ 1,759 միավոր: Կատարված հաշվարկների համաձայն՝ ֆիզիկական անձանց պարագայում վարկային քարտերը տրամադրվել են VISA և Master Card, որոնց մասնաբաժինը կազմում է յուրաքանչյուրը 46 %: Իրավաբանական անձանց պարագայում քարտերի 99 %-ը VISA քարտեր են:
Բաժանորդագրվեք մեր ալիքին Telegram-ում
