Համաշխարհային բանկի նախագահ Դեյվիդ Մալպասը հայտարարել է առաջիկա ամիսներին իր պաշտոնը լքելու մտադրության մասին, ասվում է նրա տարածած հայտարարության մեջ։
«Հարգելի գործընկերներ, հայտնում եմ ձեզ, որ խորհրդին տեղեկացրել եմ Համաշխարհային բանկի նախագահի պաշտոնը լքելու իմ մտադրության մասին մինչև այս ֆինանսական տարվա ավարտը: Ես շատ գոհ եմ մեր հիմնական ոլորտներում արձանագրված առաջընթացից և հավատում եմ, որ հաջորդ մի քանի ամիսները հիանալի հնարավորություն կլինեն ղեկավարության սահուն փոփոխության համար», – ասել է Մալպասն իր աշխատակազմին:
Ըստ Bloomberg գործակալության, խոսքը վաղաժամկետ հրաժարականի մասին է․ այն ենթադրաբար տեղի կունենա Մալպասի լիազորությունների պաշտոնական ժամկետի ավարտից մոտ մեկ տարի առաջ: Մալպասն ինքը չի բացահայտել իր որոշման պատճառը։
Դեյվիդ Մալպասը ծնունդով ամերիկացի է և Համաշխարհային բանկի 13-րդ նախագահը։ Նա այս պաշտոնը զբաղեցնում է 2019 թվականի ապրիլի 5-ից։
Բաժանորդագրվեք մեր ալիքին Telegram-ում
