Մակրոտնտեսական մյուս ցուցանիշներին զուգահեռ` արտաքին պետական պարտքի հիմնահարցը շարունակում է մնալ ինչպես սովորական քաղաքացիների, այնպես էլ մասնագետների ուշադրության կենտրոնում: Երկիրը, որն ունի մոտ 6 մլրդ դոլարի արտաքին պարտք, պետք է յուրաքանչյուր լուման ծախսի արդյունավետ և նպատակային: Այս պայմաններում կառավարության նոր ծրագրում խիստ մակերեսորեն անդրադարձ կատարելով արտաքին պարտքին՝ հույս են հայտնում, որ այն աստիճանաբար կմարվի: Սակայն, կյանքն ընթանում է առաջ, իսկ երկրում ստեղծված սոցիալական ծանր պայմանները շարունակում են անհանգստացնել մեր քաղաքացիներին՝ նպաստելով արտագաղթին:
2018 թ.-ին արտաքին պետական պարտքը դրամային արտահայտությամբ ունեցել է հետևյալ դինամիկան.
Համաձայն ԱՎԾ տվյալների՝ 2018 թ.-ի հոկտեմբեր և նոյեմբեր ամիսներին անկում ունենալուց հետո նկատում ենք արտաքին պարտքի կտրուկ աճ դեկտեմբերին: Դեկտեմբերի վերջի դրությամբ պետական պարտքի ծավալները կազմել են 2,676,531.40 մլն դրամ, որը գերազանցել է նոյեմբեր ամսվա մակարդակը՝ 59,085.80 մլն դրամով, իսկ 2017 թ.-ի դեկտեմբերի վերջի համեմատ՝ 16,449.1 մլն դրամով:
Դիտարկենք դոլար/դրամ փոխարժեքի հետևյալ դինամիկան.
2018 թ.-ի դեկտեմբերի վերջի դրությամբ` 1 դոլարի արժեքը կազմել է 483.75 դրամ, որը նոյեմբերի վերջի համեմատ նվազել է 1.34 դրամով, իսկ 2017 թ.-ի դեկտեմբերի համեմատ՝ 0.35 դրամով:
Հաշվի առնելով վերը բերված դրամ/դոլար փոխարժեքը՝ դիտարկենք արտաքին պետական պարտքի դինամիկան դոլարային արտահայտությամբ.
2018 թ.-ի դեկտեմբերի վերջին արտաքին պետական պարտքը դոլարային արտահայտությամբ կազմել է 5,532.88 մլն ԱՄՆ դոլար: Փաստորեն, դոլարային արտահայտությամբ արտաքին պարտքը 2018 թ.-ի դեկտեմբերի վերջին աճել է 137.09 մլն ԱՄՆ դոլարով 2018 թ.-ի նոյեմբերի համեմատ, իսկ 2017 թ.-ի դեկտեմբերի վերջի համեմատ՝ 37.98 մլն ԱՄՆ դոլարով:
Բաժանորդագրվեք մեր ալիքին Telegram-ում
