Թուրքիայում հզոր երկրաշարժի հետևանքով զոհերի թիվը հասել է 1121-ի

Թարմացվել է 17․40

Թուրքիայում հզոր երկրաշարժի հետևանքով զոհերի թիվը հասել է 1121-ի։

Ավելի քան 560 մարդ է զոհվել գիշերը Թուրքիայում և Սիրիայում 7,8 մագնիտուդ ուժգնությամբ հզոր երկրաշարժի հետևանքով։ Մոտ մեկ րոպե տևած մահացու երկրաշարժի ցնցումները զգացվել են մինչև Եգիպտոս, Լիբանան և Կիպրոս կղզի, իսկ Իտալիայի իշխանությունները երկրի ափերի երկայնքով կարճ ժամանակով ցունամիի նախազգուշացում են տվել:

Բնակիչները սարսափահար փախել են իրենց տներից Թուրքիայի հարավ-արևելքում և Սիրիայի հյուսիսում գտնվող քաղաքներում՝ պատսպարվելով մեքենաներում՝ վախենալով հետցնցումներից և շենքերի փլուզումից:

Երկրաշարժը, որը կարող է լինել Թուրքիայի պատմության մեջ ամենամեծը, գրանցվել է Գազիանթեփ քաղաքից հյուսիսում, որը գտնվում է Սիրիայի սահմանից մոտ 60 մղոն հեռավորության վրա և ունի մոտ 2 միլիոն բնակչություն: Տարածաշրջանը մեծ թվով սիրիացի փախստականների տուն է:

Երկրաշարժը տեղի է ունեցել տեղական ժամանակով առավոտյան 04:17-ին (0117 GMT) մոտ 11 մղոն խորության վրա․ այս մասին հայտնել է ԱՄՆ երկրաբանական ծառայությունը:

Դրանից մոտ 10 րոպե անց 6,7 ուժգնությամբ ուժեղ հետցնցում է տեղի ունեցել: Թուրքական գործակալություններից մեկը հայտնել է, որ զգացվել է 40 հետցնցում։

Թուրքիայի աղետների և արտակարգ իրավիճակների կառավարման գործակալությունը հայտնել է, որ երկրաշարժը թուրքական 7 նահանգներում բազմաթիվ մարդկանց կյանք է խլել․ տուժել է 440 մարդ: Ավելի ուշ Թուրքիայի փոխնախագահը հաստատել է, որ զոհերի թիվը հասել է 284-ի և վիրավորվել է 2323 մարդ։

Սիրիայում առնվազն 237 զոհ և շուրջ 639 վիրավորի մասին են հայտնում։ Զոհերը հիմնականում Հալեպում, Լաթաքիայում, Տարտուսում և Համայում են:

Պաշտոնական SANA գործակալությունը հայտնում է, որ միայն Հալեպում 24 մարդ է զոհվել, 100-ը վիրավորվել է նահանգում 20 շենքերի փլուզման հետևանքով։ Առնվազն 47 մարդ է զոհվել Սիրիայում ապստամբների վերահսկողության տակ գտնվող շրջաններում՝ հզոր երկրաշարժի զոհերի ընդհանուր թիվը հասցնելով 560-ի:

Սպասվում է, որ ողջ տարածաշրջանում զոհերի թիվը կավելանա, քանի որ փրկարարական խմբերը աշխատում են ողջ գիշեր՝ փլուզված շենքերի տակ արգելափակված մարդկանց գտնելու համար:

Թուրքիայի նախագահ Ռեջեփ Թայիփ Էրդողանը հայտարարել է, որ «անմիջապես որոնողափրկարարական խմբեր են ուղարկվել» ավերիչ երկրաշարժից տուժած շրջաններ։

«Մենք հույս ունենք, որ մենք միասին կհաղթահարենք այս աղետը որքան հնարավոր է շուտ և նվազագույն վնասով»,- գրել է նա Twitter-ում։

Առնվազն 1000 կամավոր փրկարարներ են տեղակայվել իրենց երկրում՝ տուժածներին օգնություն ցուցաբերելու համար:

1999 թվականին Թուրքիայի հյուսիս-արևմուտքում տեղի ունեցած հզոր երկրաշարժերի հետևանքով զոհվել է մոտ 18000 մարդ:

Ավելին՝ այստեղ։