ԱՄԱՆՈՐՅԱ ԶԱՐԴԱՐԱՆՔԻ ՇՈՒԿԱՆ. ՎԵՐԼՈՒԾՈՒԹՅՈՒՆ

Աշխարհը շուտով տոնելու է 2023 թ․-ը։ Չնայած գլոբալ միջավայրում տեղի ունեցող վայրագություններին` մարդիկ պատրաստվում են մեծ շուքով նշելու Նոր Տարին և Սուրբ Ծնունդը։ Այս պատրաստությունների մեջ զգալի դերակատարում ունեն Ամանորի զարդարանքները, որոնք մարդկանց տեղափոխում են այլ իրականություն։

Աշխարհի բոլոր անկյունները զարդարվում են տոներին ընդառաջ՝ մարդկանց հույս ներշնչելով գալիք տարվա հանդեպ։ Պարզ է, որ այս զարդարանքների ապահովման համար պահանջվում են բավականին մեծ ջանքեր։ Այս առումով պատկերացրեք՝ Ամանորի զարդերի արտադրության ոլորտում ինչ քանակությամբ մասնագետներ են կենտրոնացված։ Ընդ որում, ողջունվում է թե՛ ձեռագործությունը, թե՛ վերջին սերնդի ռոբոտների կիրառումը՝ մեծացնելով արտադրության ծավալները և կրճատելով դրա պատրաստման վրա ծախսվող ժամանակը։

Պարզ է, որ ամանօրյա զարդարանքի արտադրության և ներմուծման մեջ ներգրավված են Եվրոպայի, Ամերիկայի և Ասիայի՝ հիմնականում բարձր բարեկեցություն ունեցող երկրները։ Մասնավորապես, տոնական զարդարանքների արտահանմամբ առաջատար երկրների շարքում են հետևյալ երկրները․

Գծապատկեր 1․ Ամանորյա զարդարանքի արտահանման առաջատարները 2021 թ․-ին, տոննա

Ինչպես կարելի է նկատել Գծապատկեր 1-ից, ամանորյա զարդարանքի արտահանման շուկայում գերակշռում է Չինաստանը։ Վերջինիս՝ ամանօրյա զարդարանքի արտահանման ծավալները մի քանի անգամ գերազանցում են մյուս երկրների արտահանման համապատասխան ծավալներին։ 2021 թ․-ին Չինաստանը արտահանել է 621,800 տոննայի ամանորյա զարդարանք։
Չինաստանից հետո շուկայում նշմարվում են Նիդերլանդները, որը 2021 թ․-ին արտահանել է 29,739 տոննա զարդարանք։
Երրորդ հորիզոնականում է Բելգիան՝ 9,583 տոննա մակարդակով։ Այս ցուցակում են հայտնվել նաև Հնդկաստանը, Մեքսիկան և Թայլանդը ամանորյա զարդարանքի արտահանման համապատասխանաբար՝ 8,328, 6,392 և 6,139 տոննա ցուցանիշներով։

Ամանորյա զարդարանքի ներմուծման գործում իրենց զգալի դերակատարումն ունեն հետևյալ երկրները․

Գծապատկեր 2․ Ամանորյա զարդարանքի արտահանման առաջատարները 2021 թ․-ին, տոննա

Այստեղ բացարձակ առաջատար է ԱՄՆ-ը: Վերջինս 2021 թ․-ին ներմուծել է 310,000 տոննայի ամանորյա զարդարանք։
Երկրորդ հորիզոնականը պատկանում է Մեծ Բրիտանիային ներմուծման ծավալների 42,619 տոննա ցուցանիշով։
Երրորդ տեղում է հայտնվել Կանադան՝ 27,093 տոննա։ Այս ցուցակը եզրափակում է Ֆրանսիան, որտեղ 2021 թ․-ին ներմուծվել է 19,734 տոննա ամանորյա զարդարանք։