«Հրապարակ». Վարչապետի աշխատակազմը 6 մլն դրամի գորգեր է գնել

1 Min Read

«Հրապարակ» թերթը գրում է. «Վարչապետ Նիկոլ Փաշինյանի աշխատակազմը շարունակում է իր աշխատանքային պայմանները բարելավելու, ճոխացնելու «ազգանպաստ» գործունեությունը։ Օրերս «Հրապարակը» գրել էր, որ 51 մլն դրամ է պետբյուջեից տրամադրվել, որպեսզի Նիկոլ Փաշինյանի, նրա աշխատակազմի ղեկավար Արայիկ Հարությունյանի, վերջինիս տեղակալներ Տարոն Չախոյանի, Բագրատ Բադալյանի նման պետական այրերն ավելի բարեկարգ շենքում աշխատեն։

Եվ այդ գումարով վերանորոգվում է վարչապետի աշխատակազմի վարչական շենքը։ Ավելի վաղ էլ գրել էինք, որ վարչապետի աշխատակազմը 6 հատ գորգ է գնել, որոնցից 5-ը՝ 220 հազար, 1-ը՝ 400 հազար դրամ արժողությամբ։ Վարչապետի աշխատակազմը գորգերը ձեռք էր բերել «Մեգերյան կարպետ» ընկերությունից՝ ընդհանուր առմամբ վճարելով 1 մլն 500 հազար դրամ։

Պարզվում է՝ նոյեմբերի 11-ին վարչապետի աշխատակազմը կրկին գորգեր է գնել, այս անգամ՝ արդեն ընդհանուր 6 մլն դրամ արժողության։ Այդ գումարով «Արմկարպետ» ՍՊԸ-ից գնվել է 352.7 քմ գորգ, որի 1 քմ-ի արժեքը 17 հազար դրամ է։ Թե որտեղ են փռելու այսքան գորգը, պարզ չէ։ Երեւի որոշել են կառավարության միջանցքներն ու սանհանգույցներն էլ գորգապատել, որ ոտքները «քարին չառնի»։

Մանրամասները՝ թերթի այսօրվա համարում

Share This Article
8 Comments